Давлат солиқ хизмати органлари томонидан қонун устуворлигини таъминлаш, ҳуқуқбузарликларнинг олдини олиш мақсадида мутасадди вазирлик ва идоралар билан ҳамкорликда профилактик назорат тадбирлари ўтказилмокда.
Мазкур тадбирлардан кўзланган мақсад, ноқонуний тарзда фаолият юритаётган фуқароларни аниқлаш ва уларга ҳуқуқий ёрдам берган ҳолда белгиланган тартибда давлат руйхатидан ўтиб, қонуний фаолият юритишларига амалий ёрдам кўрсатишдир.
Жорий йилнинг 8 июнь куни Ўзбекистон Миллий ахборот агентлиги (УзА)нинг www.uza.uz сайтида «Қонунбузарликнинг катта-кичиги бўлмайди» ҳамда www.daryo.uz сайтида «Наманганлик фуқаро хонадон ертўласида яширин цех ташкил қилганлиги аниқланди» сарлавхали хабарлар эълон қилинган.
Ушбу хабарлар ижтимоий тармоқларда кенг муҳокама қилиниб, Чортоқ туманида 50 дона қиймати 100 минг сўмлик шлакоблок, Наманган шаҳрида жами қиймати 3 миллион 500 минг сўмлик икки турдаги тикув машинаси ҳамда ярим тайёр маҳсулотлари солиқ хизмати органлари томонидан олиб қўйилганлиги жамоатчиликнинг эътирозларига сабаб бўлган.
Мазкур ҳолатлар Давлат солиқ қўмитаси раҳбарияти томонидан батафсил ўрганилиб, профилактик тадбирларни ўтказишда хатоликларга йўл қўйган Наманган вилояти солиқ хизмати идоралари ходимлари З.Бойхонов, С.Турғунов ҳамда Б.Хомидовлар эгаллаб турган лавозимидан озод этилди.
Ўзбекистон Республикаси Президентининг 2016 йил 5 октябрдаги ПФ-4848 сонли Фармонига асосан ноқонуний тадбиркорлик фаолиятини амалга ошириш билан боғлиқ ҳуқуқбузарликларни биринчи марта содир этган шахслар ҳуқуқбузарлик аниқланган кундан эътиборан бир ой муддатда етказилган зарарнинг ўрнини ихтиёрий равишда қоплаган, тадбиркорлик субъекти сифатида рўйхатдан ўтган ва рухсат этувчи зарур ҳужжатларни расмийлаштирган тақдирда маъмурий ва жиноий жавобгарликдан озод этилиши белгилаб қўйилган.
Шунингдек олиб қўйилган маҳсулотлар қайтариб берилади.