Сўнгги бир йил ичида мамлакатимизда хорижий давлатлар валюталарининг эркин конвертациясини амалга оширишни йўлга қўйиш борасида бир қатор ижобий қадамлар ташланганлиги барчамизга маълум.
Хусусан, хорижий давлатлар валюталарини сотиш ва сотиб олишда талаб ва таклифдан келиб чиққан ҳолда эркин нарх белгиланиб, мамлакатимиздаги барча банк муассасаларида фуқаролардан чекланмаган миқдорда валюта қимматликлари харид қилиниши билан биргаликда тадбиркорлик фаолияти билан шуғулланувчи шахсларга чекланмаган миқдорда сотилиши ҳам йўл қўйилди.
Аммо шундай бўлсада, ҳали-хануз чет эл валютасини қонунга хилоф равишда сотиш ёки сотиб олишга уринувчи шахслар кундалик хаётимизда учрамоқда.
Бу борадаги қонунбузилиш ҳолатларига узил-кесил чек қўйиш мақсадида ҳуқуқни муҳофаза қилувчи органлар томонидан чора-тадбирлар амалга оширилмоқда.
Хоразм вилояти ИИБ ЖҚБ Коррупция ва иқтисодий жиноятларга қарши курашиш бўлими ва прокуратура ҳузуридаги ижтисодий жиноятларга қарши курашиш департаментининг вилоят бошқармаси ходимлари томонидан 2018 йил 24 август куни ўтказилган навбатдаги тезкор тадбир давомида, Урганч шаҳрининг 3-кичик даҳасида яшовчи, 1981 йилда туғилган, М.А. 7 500 АҚШ долларини қонунга хилоф эканлигини била туриб, ҳар бир АҚШ долларини 7 950 сўмдан ҳисоблаб, жами 59 625 000 сўмга сотаётганида қўл олинди.
Мазкур ҳолат бўйича Ўзбекистон Республикаси Жиноят Кодексининг 177-моддаси 2-қисми билан жиноят иши қўзғатилиб, валюта қимматликлари жиноят иши юзасидан ашёвий далил тариқасида расмийлаштириб олинди.
Амалдаги қонунчиликка кўра юқоридаги жиноят иши юзасидан айбдор шахс белгиланган тартибда жиноий жавобгарликка тортилиши билан биргаликда, ашёвий далил тариқасида олинган чет эл валютасини давлат эгалигига ўтказилишини инобатга оладиган бўлсак кўпчилик учун оддий ҳолатдек кўринган “валютафурушлик”нинг оқибатларини ҳисоблаб чиқиш қийин бўлмаса керак.
Ҳурматли фуқаролар, хорижий давлатларнинг валюталарини сотиш ёки сотиб олиш зарурати туғилса, банк муассасаларига мурожаат қилинг, бу билан турли нохуш холатларнинг олдини олган бўласиз.
З.ИСМОИЛОВ
вилоят ИИБ ходими, подполковник