Бугунги кунда шарафли бурчини виждонан адо этиб келаётган оқ халат соҳиби ва соҳибалари кўпчиликни ташкил этади. Аммо беш қўл баробар эмас, деганларидек улар орасида қинғир йўллар билан пул топишни мақсад қилганлари ҳам учраб турибди. Ҳузурига шифо истаб нажот билан келаётган беморлардан муолажа ва жарроҳлик амалиётлари учун ҳеч қўрқмасдан пора талаб қилаётган, халатининг чўнтагига пул солиб қўймаган беморларга қўл учида истар-истамас хизмат кўрсатаётган, давлатимиз томонидан бепул ажратилаётган дори-дармонларни аҳолига пуллаб ўз ҳамёнини қаппайтираётган, тиббий билим ва малакаси талаб даражасида бўлмаган таниш-билишларини пора эвазига тиббиёт бирлашмаларига ишга жойлаштиришга ҳаракат қилаётган, бир сўз билан айтганда ҳаром луқма билан кун кечиришни ўзига одат қилган айрим тубан шифокорлар ҳозирда ҳам учраб тургани жамиятимиздаги соғлом муҳитга ўта салбий таъсир кўрсатмоқда.
Урганч тумани тиббиёт бирлашмасининг Гнекология бўлими акушер-гинекологи Д.Охунова (исм, фамилиялар ўзгартирилган) ҳам енгил даромад топиш мақсадида қабулига келган бемор аёлларни таъмагирлик йўли билан даволашга бел боғлайди. Лекин унинг навбатдаги бемори Г.Эсонова жарроҳлик операцияси учун талаб қилинган 200 АҚШ доллари таъмагирлик эканини яхши англаган ҳолда Иқтисодий жиноятларга қарши курашиш Департаментига мурожаат қилади.
Ушбу ариза асосида ўтказилган тезкор тадбирда гинеколог-шифокор Д.О. бемор Г.Э.дан бепул белгиланган жаҳҳорлик операцияси учун 200 АҚШ долларини олаётган вақтда ашёвий далиллар билан қўлга олинади.
Юқоридаги ҳолатларни эшитгандан кейин беихтиёр ёқа ушлайди одам. Ахир, шифохонага ташриф буюрган беморлар яшаш учун касаллик билан курашиб, охир-оқибатда нажот истаб шифокорга мурожаат қилади. Шифокор деган номга нолойиқ айрим кимсалар эса беморларнинг дардига малҳам бўлиш ўрнига, уларнинг қийин аҳволидан фойдаланиб пора талаб қилишини кечириб бўлмайди.
Порахўрликни, таъмагирликни касб қилган ҳеч бир шахс жазосиз қолиб кетмайди. Бундай қилмиш эртами-кечми барибир фош бўлиши аниқ, охирги манзил эса жиноят курсисига етаклайди. Таъмагир шифокор устидан жиноят иши қўзғатилиб, у суд томонидан тегишли жазога тортилди.
Дилшод ВАФАЕВ
Иқтисодий жиноятларга қарши курашиш Департаменти
Боғот туман бўлим бошлиғи